ఇదియె శృంగారమండ్రునేనెరుకచేయఁ

విపుల వారు “Romantic Special” ప్రచురించారు. ఇది ప్రతి సంవత్సరమూ ఉన్నదే గానీయండి, ఈ సారి వారికి కూడా మనసు పద్యం మీదకి పోయింది. రసరాజం శృంగారమ్ అని వ్యాసానికి పేరు పెట్టారు. “శృంగార తరంగమని” కూడా కనిపించింది, ఈ శీర్షికతో నెలకొక వ్యాసం అందిస్తున్నారేమో, అందు ఈ నెల వ్యాసం “రసరాజం శృంగార” మేమో తెలియదు. అదే ఐతే సంతోషించవలసిందే. వ్యాసకర్త పేరు నాకు తోచలేదుకానీయండి, “కేవలం కామోద్రేకం శృంగారం కాదు” [రామాయణంలో పిడకలవేట: ఈ వాక్యం లో కేవలమనే మాట అవసరమంటారా?] అని మొదలునే చెప్పి కొన్ని పద్యాలు ఇచ్చారు. శ్రీనాధ కవి, తెనాలి రామకృష్ణ కవుల చాటువులు, ఇంకా కవికర్ణరసాయనము,నైషధము,విజయవిలాసము, గాధాసప్తశతి నుంచి ఉటంకించారు. పట్టుమని పది పద్యాలు. ఐతేనేం ఈ విడతకు చాలు.నా బోట్లకు సులువుగా ఉంటుందని – ప్రతి పద్యానికీ భావం కూడా ఇచ్చారు. మెచ్చవలసిన ప్రయత్నం. విపులవారు అభినందనీయులు.